Minung nih Nunnak a serkhawh ve cang!

Minung nih Nunnak a serkhawh ve cang http://www.cyona. info/index. php?option= com_content&view=section&layout=blog&id=7&Itemid=21 Craig Venter chuahkehnak cu Salt Lake City,Utah a si. A tlanval lio ah fimcawnnak lei ah a biatak tuk lem lo. Ti cung le lawng cung ah um lawng a rak huam. Reprot card ah grade Cs le Ds pawl he a lawm peng mi a rak si. Time Megazine nih Venter cu a hngakchiat lio tein mi pakhat khat a cang te lai tiah a ho hmanh nih an hmu lem lo an ti. Mills High School in a dih hnu ah San Mateo Community College, California ah apeh. 1972 ah Bachelor of Science Biochemistry in a dih i 1975 ah University of California,San Diego in Physiology le Pharmacology in Ph. D a dih. 1984 in National Institute of Health ah riantuan hram a thawk. May 20, 2010 ah J Craig Venter nih nunnak a ser kho cang ti mi thawng vawlei cung ah a thanh. Nunnak cu Pathian lawng lawng nih ser khawh a si tiah zapi nih theih mi le pom ning a si. Minung zong nih a ser khawh ve cang. A thil hmuh mi thawng in khamhnak si (immunization) chuah thawk in pawngkam filhhnawmhnak (environmental pollution) thianh ding tiang ramthar rian tuan khawhnak a lam a hmuhsak piak. Cu ve bantuk in khat ta lei in biahalnak a um ve mi cu minung nih nunnak a ser ti mi hna hi kan tuah awk a si maw si lo ti mi le hi fimthiamnak hi thatlonak lei ah a hmang ding sin ah phanh sual ah cun zeitin dah khua kan khan te lai ti mi a buai mi zong an um ve. Hika YouTube http://www.youtube. com/watch? v=qPE2CnThito ah na zoh a si ah cun avoikhatnak minung nih a ser mi nunnak cu na hmuh lai. Kum 15 chung a retheihnak vialte i a theipar a si. Hi nunnak a ngei mi rungrul hi von zoh ah cun a simple tuk mi te a lo nain, minung nih a rak ser lo ah cun hi vawlei cung hrim ah kan rak hmuh khawh lo ding khi a si. A umnak cu Maryland State i J. Craig Venter Institute www.jcvi.org ah a si. Amah a ngeitu le a sertu cu fimthiamnak a ngei mi mirum pa J. Craig Venter a si. Minung nih nunnak ser ti mi hi a luan cia mi caan tuanbia zong ah minung sinak sernak ah saduhthah a ngan cem le a sang cem ah ruah a rak si. Frankinstein timi lenhoih ah sibawi pa pakhat nih mithi pawl an pum pawl kha thit chom le fonhtomh chom in nunnak a ser ti mi kong a rak tial i vawlei cung zong ah minthang ngai cauk ah a rak cang i bisakop zong an rak thlak len. Catialtu lila zong nih a uar cem mi cauk ah a tel mi a si. Frankinstein cu nunnak cu a ngei ko nain mi kut,mi ke,mi pum,mi hmai,mi chungrel vialte peh chom mi a si caah a mui cu a chia ngai ngai. Nunnak a ngeih caah khua tuaktannak zong cu a ngeih ve i amah le amah minung tak tak ah a ruah i minung tak tak pawl zong kha a komh duh tuk hna. Asinain a muisam nih minung dirhmun a phanh ve lo caah minung nih cu minung ah an rak rel lo. Cu cu a theih cang ka tein komh a rak zuam i amah an komh duh lo mi pawl kha a huat cang hna. That hna a that than ti a si i a hnu cem ah cun amah a nunnak a rak ser mi sibawi pa lila nih a dawi a dawi i an i ton tik ah a sertu pa kha lungpang chung ah a zuan pi i an pahnih in an thi tiah a donhter. Mithang rock hlasak thiam Alice Cooper ti mi zong nih Feed My Frankinstein ti in hla a rak phan i rock hla a uar mi pawl nih cun kan rak uar ngai ngai. http://www.youtube. com/watch? v=AvVH5evrrUY&feature=fvst Pathian nih nunnak a ser mi le minung nih nunnak a ser mi kong ah a dannak pakhat te lawng a um. Pathian nih cun nunnak a ngei lo mi tlak in nunnak kha a rak ser. Minung nih cun nunnak a ngei cia mi i rungrul i a kutke cheubang in nunnak cu a ser. (Frankinstein lenhoih zong ah cun nunnak a ngei cia in a thi mi pawl kha a komh hna i nunnak cu a ser). A fawinak chim ah cun nunnak a ngei cia mi kha hman in nunnak kha a ser kan hei ti lai cu. An thil hmuh mi nih a chuah pi mi cu minung nih an duhning muisam chuah ding in nunnak (cell) chuah pi khawh ding khi a si. Nan theih cio kan theih cio bantuk in DNA cu saram vialte i nunnak a hram cu a si. Kan theih ding ah a chap ding mi cu hi hnu hmai lei ah DNA zong hi Walmart i thil cawl bantuk in minung nih kan cawk khawh ve te lai ti mi kha a si. An rak tuah mi cu nunnak phun kip i DNA pawl kha an kut,an ke, an tenge ti bantuk an lak hna I an komh ter hnu ah DNA a thar pakhat an chuah ter mi cu a si. Hi thil an tuah khawhnak ding ah kum 15 an rak rau. An tuah khawh mi DNA kha tha tein le pum tlam tling tein a thang (grow), a then zong a then kho (divide) i a karh zong a karh kho (multiply). Cu cu nunnak a ngei ti mi a sullam a si. Hi thil vialte hi computer software hman in tuah mi a si. Hi thil an hmuh mi nih zeidah a pipa a chuah pi kho lai tiah biahalnak an ngei. Craig Venter nih a ti mi cu a phatnak ah minung nih heh tiah kan i zuam leng meng mi hmuitinh mi pakhat kan chuah pi kho ve ti nak a si. A pahnihnak ah khamhnak si (immunization) thar chuah khawh ding ah a lam a um te lai i a pathumnak ah Carbondioxide thlichia a dawp kho mi rungrul nunnak thar chuah i CO2 ruang ah a cang mi pawngkam filhhnawmhnak vialte a thianh ter kho te lai a ti. US ram lai mi pawl zong hi hnu nikhat khat ah cun kan pumsa chung i thil tha lo vialte a thianh ter khotu rungrul DNA thar bantuk internet online in a cah cah i cawk khawhnak a lam a um kho te men. dr. van http://www.cyona. info/index. php?option= com_content&view=section&layout=blog&id=7&Itemid=21 ================= Life is like a book, everyday is new pages

Thlarau Bomb

THLARAU BOMB   Note: This message is forwarded to Lai Forum by vtcung@yahoo.com on 8 June 2010.   From: zscinzah <zscinzah@yahoo. com> Subject: Re: [Rung] DC-CIVUI avoikhatnak Muko To: Rungcin@yahoogroups .com Date: Tuesday, June 8, 2010, 3:29 AM Dear U Bawi,   DC-CIVUI ah Thlarau Bomb nan puah dingmi le thlarau software -nuclear cu CIVUI a zawhmi chung ah nan installed dingmi hi, zeibantuk thlarau software, zeibantuk thlarau bomb? tiah i fiang huaha lo ahcun, a dik lomi bomh or a dik lomi software nuclear hna installed sual ahcun trojan virus pawl khua thatnak le sopawtnak, ralthatnak ah a cang sual kho men mi a si.    A nungmi Pathian thlarau tak tak kan chung ah a um hlan ah  thlarau Bomb (zei thlarau theih lomi) khuvai hna kan ri i, thlarau software- nuclear, zeibantuk nuclear software timi theih huaha lomi hna kan chung ah aa installed cang sual ahcun, a dikmi Pathian thlarau installed cu a har ngai cang. A in, aa install kho ti tawn lo.     Bomb khuvai sawh sawh kha Pathian thlarau tak tak ah kan ruah sual ahcun, kan lungfim a har tuk cang lai.  Zei thlarua theih lomi  Thlarau Bomb khuvai sawh kan ri cang ahcun kan ttang tuk fawn lai. Kan rit hnu ahcun kan mit a maw cang i lamhlapi tiang (future) kan hmu kho ti lo; Cubantuk Thlarau Bomb sawh sawh a ri mi hna kan cung ah Satan cu a thu i kan chak a mawngh cuahmah ko timi hi kan rit hnu ahcun kan lung  a fim kho ti tawn lo i, a nung mi Khrifabuu hna cheu hnih ah kan cheu men tawn ko hna cu! A ri cangmi, a  mit a maw cangmi hna hi Satan nih a hman duh ngai tawn hna.   Pathian thlarau tak tak kan chung ah aa installed i Pathian Thlarau Khuvai tak tak kan ri ahcun Pathian cu dawtnak a si bantuk in dawtnak he kan khat lai i, dawtnak cu a thin a sau, a lung a puam lo, thlachiat a ruat timi vialte bible ah kan hmuh bantuk in dawtnak le remnak a ser dingtu kan si timi lungput he khrifabuu a hunghimtu ding ralkap ttha kan si timi lungput an ngei. Church cu Jesuh pennak govenrment a si i Jesuh pennak  government a vengtu ralkap buu cu zumhtu hi kan si.   [CIVUI, Conference, Crussage le Campaign tibantuk ah thlarau bomh ttha lo a puak sual ttheu i, bomh ttha lo khuvui a rimi hna nih hin Jesuh pennak (government- Church) cu a vengtu an sinak cu kal tak in Jesuh pennak a hrawktu, a khuaitu an si tawn; A tak tak ahcun thlarau thianghim a ngeimi nih Khrifabu a dirhkamhtu, zumtu tha an si bantuk in Khrifabu thazaang a thawntertu ding an si awk a si tawn.]   Cucaah, Atutan DC-CIVUI ahcun pakhat cio nan CPU cu clean (thianh) ta dih ulaw, thlarau bomh sawh sawh puah loin, thlarau software sawh sawh installed ti loin, Pathian Thlarau tak, a dikmi thlarau cu lungfim kirkiar tein pakhat cio nan chung ah rak i installed ulaw timi hi kan duh sak ngai ve hna.   Pakhat cio nan CPU ah installed ciami thlara thianghlim cu thlarau ttha lo nih a tuaitam khawh lonak ding caah a ttha bikmi Thlarau Anti Rivus-  Thlarau ca thlacamnak - every day scan khawh ding - nichiar te thlacam khawhnak nun . Kaspersky" bantuk in CPU a veng khotu thlacamnak software zong pakhat cio nunnak ah rak installed cio seh law a tha tuk hnga.   Nikhat ah suimilam pakhat tal lung tak tak tein thla kan cam peng ko ahcun kan pumsa, thlarau (CPU) cu a dam peng ko lai.   Upatnak he,   Zasang Cinzah Kuala Lumpur ---   From: Salai Bawi Uk Thang <cbthang@yahoo. com> Subject: [Rung] DC-CIVUI avoikhatnak Muko To: "Laiforum@yahoogrou ps.com" <Laiforum@yahoogroup s.com>, "Rungcin@yahoogroup s.com" <Rungcin@yahoogroups .com> Received: Tuesday, June 8, 2010, 9:30 AM   Careltu Laihritlai Ulenau hna, Kan theih pah lengmang cang bantuk in tutan DC i tuah ding mi CIVUI hicu voidang CIVUI he ilawh dawh asi lo. A luancia kum i Battle Creek Civui lio ah khan CIVUI timi hi zeiset dah asi, zeitindah arak ithok ning asi tibantuk kha thlapa thla 6 chung hrawng rak icaih asi i CIVUI kongcu dehkhat zong taanglo in lehthal dih arak si. Civui hi Khawmpi asi maw? ti arak si i asi lo, Civui cu Civui asi ko ti in aphi kan rak chuah.  Tutan DC i kan tuahdingmi CIVUI tu hi cu khawmpi zong asi lo, hlaan lio i Kawlholh i rak tuahmi asii a wai timi  bantuk zong si ti lo in aralaimi caan i Van le Vulei karlak i tuahding asi cangmi Jubilee (Marriage Supper) bantuk thlarau le biatak i tuahmi The Spiritual Harvest Festival tu si ding khin timhlamh asi. Voidang ah cun Civui hi rawl thawthaw ngaihnuam le zohnuam aphunphun khin hlunhlai ter rak itimh asi tawn na in tutan cu cuticun asi ti lo. Chunglei thlarau tu in ttamh le muaih itimh asi i mah hikong hi khual lei nih rak theihthiam piak aherh ngai te ding khin a um. Sia, Caw le Vok tibantuk Salu in Civui suum kan tah lai lo. Thlarau tlau tlaikhawhmi tu in tah asi lai. Civui arak zawhmi an rat lei le an tlun lei hi idang hrimhrim seh ti in Biathli rak ichimhchung asi cang. Biathli nih azawh lo ah cun thlarau Bomb zong puah ahau te meen lai ti in Thlarau lei  Software-Nuclear zong order timh asi. Mah belte kan bomb le kan nuclear nih a kheen mi hna, hma apumi, ahliam mihna hi mivaanttha tu an si te lai. A umtu ning cu tutan Civui ah hin Hardware nak in Software lei tu in hmual hman deuh itimh asi. Virus phunphai cu  adeet in an de ti lai lo ti ah Aamah an khaan cia cang kan ti lai cu. Tutan cu Khualipi Standard lawlaw hmang hna usih law ti asi i innteek mitampi zong rian le khai le buailebai hna ahnok tu lai ti in Lamnaihnak Hotel i um dingin itimh pah cio asi tin theih asi. Civui ti hi Thlarau lei kan kumvui asi ti in ruat lawlaw cang usih law Rawlttuan ding in zuumtu Laimi Khrihfa pohpoh rak ithawh cio uh ti i SAWMNAK avoikhatnak Muko (The first Trumpet) kan tum cang. Salai Bawi Uk Thang Inteek Khrihfabu ================= Life is like a book, everyday is new pages

Theihawktlak Lai Nunphung tete!

Lai Nunphung Theihawktlak tete! Date: Friday, May 28, 2010 10:41 AM From: "Vanthawng Cung" <vtcung@yahoo.com> To: laiforum@yahoogroups.com, rungcin@yahoogroups.com Subject: Theih awk tlak Lai nunphung tete!   Careltu u le nau,   Zeitluk in chantiluan nih a kan fenh le khoika kan um hmanh zongah kan lungkil ah kan nunphung thlarau a ca'm peng ko tiah ka ruah. Chiat ni, tthat ni kan ton caan ah kan nunphung thlarau hoih ning in kan i zohkhenh lawngah kan di a riam, kan lung a hmui. Mahtluk i a ttha mi kan phung tete hi ramleeng tthangmi kan fale nih an thlau dih sual lai ti pha'n a um ko. Chimrel pah lengmang a hau in ka ruah. Cucaah, fanaule ca hmuitinh in a cheuchum te ka hun ttial nak asi.   Tlangzamh:   Tlangzamh hi mizei miphun hmanh nih an ngeih ka thei lo. Mah nih hin zeitluk lungput ttha a ngeimi miphun dah kan si ti a langhter ngaingai. Tlangzamh cu dawtnak le siaherh langhternak asi. Khua pakhat ah chunhthah a um tik le ramsa an kah tikah a ngeitu or a kaptu nih mahti hin fawh hualvan ttha kan ton... tiin a hmuhton mi sa cu inn kip tingco dingin an can hnu ah an zamh (phawt) cio hna. Keimah pa hngakchia ka si lio tiang hi tlangzamh cu a um lengmang ko rih. A hnu ah mi an hung fim dedeuh i duh-aamnak le chawhrawlnak lungput a hun ngeih caah hualvan ttha a tongmi zong nih tlangzamh cu duh ti loin a zuar in an hun zuar. Cuticun a lo ziahmah i a tu cu a tlau thai cang. Atu ah tlangzamh nunphung cu um ti hlah hmanhsehlaw a philosophy cu mi tampi thinlung ah a ca'm peng rih ko. Mi cungah dawtnak ngeih le siaherhnak langhter cu kan krihfa biaknak zong nih a kan cawnpiak mi asi caah fanaule thinlung chungah zungzal in hmun hram ko seh ti cu nu le pa hna kan thlacamnak asi.   Arthin tuh:   Arthin tuh cu kan dawtmi hna nih hi vuleicung nunnak in an kan kaltak cang ko rua lai ti kan zumh tik an cungah a hnubik dawtnak langhternak le, hringtu nu le pa an si ahcun an sin in thluachuah halnak caah tuah tawnmi nunphung asi. Atu ahhin ram leeng ummi hna nih kan khua kan ram ah vung tlun in kan nu le kan pa, kan pi le kan pu arthin vung tuh cu kan nungphung nih a kan fial ngaingai mi leiba pakhat asi. A min hi arthintuh ti asi nain a'r taktak va thah i a thin va tuh cu asi lo. Ke-li nei sattil in tuah phung deuh asi.   Rawlhniang put:   Rawlhniang put timi cu nu nih vaa a ngeih a thaizaan ah nu chung nih pa inn ah zaanriah hrawmttinak an tuahmi khi asi. Chunhthahnak i sa thawthaw a chungril ti bantuk kha mah zaan caah cun an fim piak ttheo hna. Mah rawl einak cu an fanu nih a vaa inn ah a voikhatnak rawl a ei nak ding asi caah biapi ngai ah an ruah. A ning maw zak sual lai kaw ti an ruah piakmi dangkhat, an dawtnak langhternak zong dangkhat a pahnih komh lungput in tuah asi.   Nukai thlah:   Nukai thlah timi cu vangeih zaan i monu a vaa inn i an vung thlah khi asi. Nu lei chungkhat a nu hawi nih thlah phung asi. Pa kal phung asi lo. Tuchan ah pa zong khat tthup in kal kan hmang i, nunphung mit cun zoh a chia ngai. Krihfa phung in pei kan um cang cu kan ti asi ahcun nukai thlah a hau ti lo. A mo le nih an thlah kha a zaa ah ruah khawh asi.   Muikhum:   Muikhum cu ningzah mualphonak ton tik caan ah tuahmi asi. Ni-far le nih maw, patling zong nih maw khuapi zatlang theih in ningzah mualphonnak a ton tikah a nu a pa, asiloah, a unau nih sathi luanh in a mui cu khum phung asi. A sullam cu ningzah mualphonak na tonmi kan in theihpi, sathi in na hmai kan in phiah piak cang, na ning zak ti hlah seh, atu thawk cun zatlang sinah mikel um in vung um tthan cang tinak asi. Ram leeng ummi nih hin hi thil hi kan ton pah, tuah zong kan tuah pah lengmang ko. Nain, a min tak bunh duh loin 'thlacamnak' ti phun lawng in kan kalter lengmang.   Thlathlauh:   Thlathlauh hi Lairam hmun zeimaw ah cun muikhum he aa cawhmeh pah mi a lo. Nain, aa dang deuh in ka ruah. Keimah theihning in cun phun hnih a um. Phunkhatnak cu - 'keimah ve...' ti lungput in duhlonak he tuahmi asi. Tahchunhnak ah, zulaap ton lo ruangah maw, sazam hleh hrelh ruangah maw thinhun in sa thah ve i, i thlathlauh khawh asi. Cun, a phun hnihnak cu - thih hring in a thi hnga dingmi dirhmun ah a um cang ko mi nih an nunnak an luat sual tikah nu le pa, chung le khat nih thlathlauhnak cu tuah piak asi. Tahchunhnak ah, Nah-Lah-Kah chan lio ah khan ka u (cousin) pakhat hi ralkap nih an velh i a lu ah hreitlung in an rak tuk. A thi cang tiin an rak hlawm. Nain, zeitimaw in a nung i sizung ah saulak a um hnu ah ttha tein a dam tthan. Cutik ah, ka pate nih caw le vok in a thla cu a rak thlauh.   Thlahual:   Thlahual hi Mizo phung maw asi, Laiphung dik...kaa fiang tuk lo. Mizo nih cun an hman. Keimah zong nih voikhat ka tuah bal. Thlahual cu ni-farle maw, tule nih maw thihnak an ton tikah sa thah i zaanriah kil ttinak tuah khi asi. A sullam cu - ka tu, ka fale hna nan thla ka'm hlah uh...nan pu ka um hih...tiin dirkamhnak le thazang pek langhternak khi asi. Nunphung ttha ngai asi caah ka hun ttial ve.     Va cung pa duh (Uire):   Laimi kan pipu chan lio ah cun nu le va asi cangmi i tthen cu a chiakha tuk ah ruah asi. Nupi pasal an i ngeih hlan ah nu le pa, chungle khat nih an tuaktan cikcek hmasa. Cuhnu lawngah an i tthi-laa. Cucaah, biakam a fek i itthen zong a tlawm ngaingai. Cubantuk in vaa he a um liomi nu nih padang sin a sual ahcun 'vacung pa duh' ti asi. A nupi nih a va theih loin pa aa duh ahcun a vaa kha a thi kho tiin ruah a rak si. Cucaah, minu nih padang sinah a sual sual ahcun a vaa inn ah ttin phung asi ti lo. A tta-pale inn ah kal i a tuahmi sualnak cu va chim phung asi. Cuhnu ah a tta-pale nih a vaa chungkhar sinah phung ning in va lenkai i va chimh asi. Tuchan fanaule lakah vaa cung in pa aa duh mi zeizat dah kan si hnga? Nupi a ngeih ko nain nungak helh a hmangmi zeizat dah kan um? Mi nupi a sualpi mi, lemsoi a hmang mi zeizat dah kan si? Kan nungphung nih a ttihbik mi le a huatbik mi asi, ti hngal hna usih.   Ttian buh er (or) Ttian buh erh:   Ttian buh erh timi cu nu le va i tthen lai a donghnak zaanriah i hrawm ttinak khi asi. Pa nih thil pakhat khat ruangah a nupi a maak lai zaan ah a tuah tawn. Buh le sa thaw tein a damh hnu ah khim tein rawl a ei pi. An ei khim in nu nih a hman tawnmi sei le hnam kha a laak i a pek, cun, "kan maak" tiah a chimh. Pa nih mah ti a chim hnu ah cun nu nih a vaa inn ah um chih phung asi ti lo. Pa zong nih mah bia a chim hnu ah lungchir le i leet tthan khawh asi ti lo. Cucaah, 'ttian buh er' ti tehna, 'kan maak' timi bia tehna hi kan laiphung ah cun a suarhar tukmi an si. Tuchan ah fanaule nih hi bia hi a tlawm khawh chungin nan run chim ding cu nu le pa nih duh piak ngaimi asi.   Thiangi pa Maryland   Note: Kei hi Laiphung thei mi ka si lo. A herh ca tu ah ka theihmi hnihkhat ka hun ttial bia asi. Hmunkhat le hmunkhat, khuakhat le khuakhat theihning zong aa lo cio lo kho men. A ruah zia tu i thiam piak hna usih. Fanaule caah tthahnem santlai si hram ko seh.   ================= Life is like a book, everyday is new pages

Damdam tlaih (or) Kuttlaih

Damdam tlaih (or) kut tlaih (Handshaking)   'Damdam tlaih' (handshaking) aa thawknak hi research tuahtu hna nih fiang ngaingai in an chim kho lo. Nain, Jesuh chuahhlan 2nd century BC hrawng in i thawk cang sehlaw a dawh an ti. Nitlak lei vawlei (western world) i a hung luh hi 16th century BC hrawng si dawh asi. Tuchun ni ah cun Arab miphun cheukhat, Islam biaknak a bia mi le Orthodox Judaism dah ti lo nih cun mah nunphung pakhat bantuk in hman cio asi cang. Vawlei khuaza miphun vialte nih mah ti kan i hrawm khawh mi hi ruah tikah khuaruahhar ngai zong asi. Zeiruangah dah asi hnga? Thil ttha asi caah asi lai ti cu a fiang. Thil ttha lo cu siseh law miphun kip nih kan i hrawm kho hnga lo. Tuchun ni kan hmanning zoh tikah mi tampi nih cun hoihhomhnak (politeness), asiloah, aa dawhmi langhning (social etiquette) pakhat bantuk in cohlan asi.   A sullam:   A sullam cu "Ka kut nih hriamnam aa put lo, ka thinlung ah daihnak a um" tinak asi an ti. Cucaah, kut nih thil pakhat khat aa put buin damdam tlaih cu a phung asi rua lo.   Cin awk le Hmanning tlangpi:   1. Damdam tlaih tikah orh lei kut (right hand) hi hman phung asi. Keh lei kut (left hand) cu hman phung asi lo. Na kut cu a pahnih in a lawn (empty) awk asi. Zeicaah tiah, orh lei kut cu midang zuanhnawhnak (attack) tuahtu ah ruah asi i, keh lei kut cu mah le mah i vennak (defence) tuahtu ah ruah asi.   2. Kut i tlaih tikah an mit falai kha dengteo in zoh i lungtho tein chawnh phung asi. Kut tlaih pah in khuadang hoi le midang chawnh cu a phung asi lo. Tlaihmi hna nih an i ngaihchiat khawh.   3. I tlaih tikah an kut kha faaktuk in reh phung asi lo. Dintuk zong in tlaih phung asi lo. Faaktuk reh chih cu hruh (rude manner) ah ruah asi. Dintuk tlaih cu thinlung pek lo ah ruah asi fawn. Cucaah, a za tawk tein tlaih thiam i zuam a tthabik.    4. Kut ah hma a um bu in maw, kut hnawm bu in maw, kut-hruk i hruk bu in maw damdam chanh le tlaih phung asi lo. Kut-hruk aa hruk mi nih i phoih hmasa awk asi i, a kut a hnawm mi nih aa ttawl hmasa awk asi.   5. Sullam um tuk lem loin damdam va chanh lengmang cu a phung asi lo. Su'l le lam a ngeimi asi caah tlaih tam poh kha thil ttha ah ruah dih awk a ttha lo. A ruang a um a hau i thinlung tak zong asi a hau.   6. Damdam tlaih cu a tlangpi in lunglawmh langhternak, hlawhtlin lawmhpinak, ning i hawhnak, ttian zai re'l caan, khuakhan lairel caan, nuamsul tuah caan, lente celh caan, biakamnak tuah caan, laksawng pe'k caan le a dangdang mibu pumhkhawmhnak hna ah hman asi. Ngaihchiat mitthli-tlaak lio caan i damdam chanh cu sullam a ngei tuk lo.   Thiangi pa Maryland ---Source: Laiforum & Rungcin group mail on 11 May 2010 sent by vtcung@yahoo.com ================= Life is like a book, everyday is new pages

Nunsiannak: Hruaitu Hna Nunnak Khuaihliti

NUNSIANNAK: HRUAITU HNA NUNNAK KHUAIHLITI   Pu Obama le Pu Joe Biden Income tuaknak!   Nan theih cio bantukin April 15 cu US ah Tax file donghnak ni asi. Cucaah, US ramhun ka pule pahnih nih 2009 chung i an phaisa hmuhzat le hmannak zong fiah i mipi sinah puanzarh piak an si. Umharpheng ah rak zoh ve sawhsawh tuah u. Nan ruahning an si maw, si lo dik!   Pu Obama nih 2009 kum chungah a phaisa ser zat cu $5.5 million asi. A tambik cu a ca-uk ttialmi pahnih, "Dream From My Father" timi le "The Audacity of Hope" timi in a hmuhmi miakmai asi. Cun, 2009 kum chung tthiam ah Nobel laksawng $1.4 million a hmuh rih. Cucaah, Lai ngaca'r tuak cun a hmuh mi zapi cu $6.9 million asi, kan ti lai cu. Hi chung in $1.8 million Federal tax ah a pek. A laksawng hmuh mi $1.4 million hi sunghno rianttuannak (charity) bu 10 sin ah a hlut dih. Cun, amah kutchuak liauliau chungin $329,000 hi sunghno rianttuannak tthiam ah a hlutmi a um. Negro Student Fund caah $50,000 a hlut rih fawn. Cucaah, a hmanmi zapi cu $3.579 million asi. A hmuhmi zapi chungin a hmanmi kan hnuh piak tikah $3.321 million lawng hi amah caah a taang.   Cun, Hotu-chang Pu Joe Biden nih 2009 kum chung i a hmuh zat cu $333,182 asi. Hi chung in Federal income tax ah $71,147, Delaware income tax ah $12,420, Virginia income tax ah $1,477 a pek. A tax pekmi zapi cu $85,044 asi. Sunghno bu rianttuannak ah hlutmi a ngei lo. A hmuhmi zapi chungin a hmanmi kan hnuh piak tikah $248,138 amah caah a taang ve.   Thiangi pa Maryland ---  Source: Laiforum & Metkhuabo group mail on 23 April 2010 by vtcung@yahoo.com ---   Thiangi Pa, Pu Obama le Pu Biden phaisa hmuhnak le Tax pek nak kong cu, ka theih hmasat cem lio ah, "Pe ulaw ti cun, pek in nan um lai" ti mi hla le "Lung lawm te'n a pe mi cu Bawipa nih..."Baibal caang ka lung ah an lang. Hmun khat rianttuan tti mi an hmuhnak, hmannak le thawhlawm ( Biakinn theng thawh lo mi zong) aa thlau tuk ning cu a mak ko. Pu Biden hi ttha te khua  aruah ah cun phuhrun ngai ding asi, US pumpi rian sangcem chang tlaih ko bu i sunghno rianttuan nak lei ah thawhlawm a thawh ve lo ning hi! Inn man, Transport, Electric, Gas, water, phone etc...bills  zeihmanh pek a hau fawn lai lo.:). Hruaitu ttha hi ngia cio hna hmanh uh, pekchanhnak le nunsian nak he an itthen kho bak loh (Obama hi hruaitu ttha a si/ a si loh ti chim duhnak si lo in). Nunsian nak hi Hruaitu asi mi poh nih neih cio dingmi nunnak khualiti pakhat asi. Cun, Pu Biden thawhlawm ruah tik ah Nunsian hi phaisa tampi hmuh ruang ah asi lo nak zong a fianter ngai. Laimi siseh law cei lak in thangchiat aa huah hnga dah!:) Ka ruah ttheu mi cu, Laimi hi lungthin lei kan chambau ngai ko bu ah Nunsiang ngai kan rak si ve ko. Sahlawh rualchan kan izohkhenh hna ning le thawhlawm kan thawh mi tete ruah tik ah. Partha Pa nih cun, "Mizo nih, mizo kan si, kan mui aa dawh an ti, kan nih tu cu, Laimi kan si, izawnruat hna usih" ati ttheu. Hi zawn ah hin, 'Laimi kan si, Nun siang usih' tiah chap ka lungchuak ve. Dam te cio in, NTL JP ---  Source: Metkhuabo group mail on 24 April 2010 by ntlian@yahoo.com (Ngun Thawng Lian)   ================= Life is like a book, everyday is new pages

KANMAH

Kanmah Chimthli     Kan sang, kan khua Kan buu, kan peng Kan ram, miphun Ahruai kho lo mi Keimah, Keimah Timi lungput, a mui chia tuk.   Keimah tuahmi Keimah khaanmi Keimah chimmi Keimah hruaimi Keimah thawng in, Miphun pi lungput a si lo. Krifa tha lungput a si lo.   Kan i bawmhnak thawngin Kan ttuan ttinak thawngin Kan khaan ttinak thawngin Kan i hruainak thawngin Kan dir ttinak thawngin Kan miphun kan cawisan lai A kan teitu an um lai lo.   Keimah tinak lungput ngei lo in Kanmah timi bia he kan ttuan ti lai kan i fun lai, aho tthen khawh lo in.   Mi tampi luhter hna na thinlung chung ah Kanmah timi bia nih na lung an nuamh ter lai. Din te in chim ko ning law, ...... Nangmah maw keimah ti cu chim awk ah a dikmi bia a si lo. Vawlei le Laimi ruahchannak cu Bia fate Kanmah. ________________________   Chimthli @ 2007   -- Yours sincerely, Bawi.   --- Source: YCCF-International@yahoogroups.com mail by cbawimanglian@yahoo.com on 22 April 2010. ------------------------------ "Serve with gladness"